Genesis претстави многу интересни Magma концепти

Од времето на пишување се случува Саемот за автомобили во Лос Анџелес, каде што генерално дебитираат возила кои не ги добиваме ние европејците. Genesis, луксузниот подбренд на Hyundai Motor Group, на саемот се појави со неколку интересни концепти. Кога викам интересни, мислам многу интересни.

Прво…

Genesis Magma GT Concept

Genesis

И мене малку не ми се веруваше, ама да, Genesis претстави концепт за суперавтомобил со mid-engine распоред. Не е ни некаков турбо V6 од другите модели на Genesis, туку од сценското деби јасно беше дека се работи за V8 мотор. Magma GT во секој поглед личи на суперавтомобил, дури има и крилести врати. 

Genesis

Genesis со овој концепт го најави својот план за мотоспорт и перформанси во идните 10 години, и големи се шансите дека ќе се појави тркачка верзија од Magma GT Concept кој ќе се натпреварува во Le Mans и слични шампионати. Ако мене ме прашувате, нема смисла да нема и сериска изведба на овој модел.

Идеален конкурент за Toyota и Lexus суперавтомобилите кои допрва треба да ги видиме, и со тоа ќе стане дел од новото движење на производители кои влегуваат во светот на суперавтомобили после долго отсуство, или, во случајов, за прв пат. Засега нема други информации, само желбата овој модел да добие зелено светло.

G90 Wingback Magma Concept

KoreanCarBlog TV / YouTube

Понатаму, го имаме мојот омилен модел кој Genesis го претстави на саемот, тоа е G90 Wingback Magma Concept. Зошто Wingback? Затоа што е караван. Се сеќавате како некои компании изработуваа караван изведби од W126 S-Klasse на Mercedes? Тоа е приказната и тука, а плус има и дополнителни спортски детали од Magma кои инаку ги нема кај обичниот G90.

Обично не сакам да кажувам вакви дефинитивни реченици, ама овој пат морам да направам исклучок: не само што е ова еден од најатрактивните концепт автомобили од изминативе 10 години, мислам дека е најатрактивниот концепт за караван од изминативе 20 години. 

KoreanCarBlog TV / YouTube

За овој модел исто не се знае дали ќе стигне до сериско производство, но јас не мислам дека треба… мислам дека мора. Од сценскиот настап можевме да слушнеме дека се работи за турбо V6, и ова може да се покаже како интересен конкурент за Audi S6 Avant и Mercedes-AMG E53 Wagon.

G90 Wingback Concept беше изнесен на сцената заедно со Genesis X, купе концептот кој го имаме видено и претходно. Лук Донкерволк, креативниот директор на Genesis и човекот чие портфолио ги вклучува Lamborghini Gallardo и Bentley Continental GT, тврди дека овој модел може да се стави во сериско производство без некој голем трошок, и дека е речиси спремен. Ајде Genesis!

GV60 Magma

Заедно со овие фантастични концепти беше претставен и еден сериски модел, GV60 Magma. Ова е performance верзијата на GV60 електричниот кросовер, базиран на E-GMP архитектурата која ја дели со Kia EV6 и Hyundai Ioniq 5. Погонскиот систем е многу сличен како кај Ioniq 5 N, односно два електромотори, 650 коњски сили, погон на сите четири тркала, а ќе има и симулиран DCT менувач и звуци од бензински мотор, исто како кај братучедот од Hyundai.

Genesis

Суптилност е странски збор за GV60 Magma, бидејќи и тој беше претставен во оваа гласна и приметлива портокалова боја. Има неколку релативно суптилни аеродинамички додатоци, со исклучок на задниот спојлер изваден директно од Need for Speed Underground 2, а фелните ме потсеќаат на нешто што би го виделе кај Porsche GT3. 

Мислам дека досега не сме виделе друг луксузен бренд кој не е германски олку сериозно да ја сфаќа работата. Со суперавтомобил, брз караван, и електричен кросовер со 650 коњи и режим за дрифтање, како што кажаа и самите Genesis, ова е ново поглавје во приказната на брендот. Мислам дека ми е омилено поглавје.