Конечно претставен новиот Jeep Compass

Понудата на производи на Stellantis поставени на STLA Medium платформата е веќе доста голема. Сега можеме да му посакаме добредојде на уште еден член на оваа фамилија, од кој фотографии видовме претходниве неколку дена (пред да смееме).

Ова е новиот Jeep Compass

Jeep

Претходниот Jeep Compass беше со нас добри десетина години, а сега конечно дојде време за нова генерација. Освен сосема новиот дизајн и, за прв пат, достапноста на ЕВ изведба, друга важна вест за Jeep Compass е тоа што е сега поставен на STLA Medium платформата.

Целта за новата генерација на Compass е да биде глобален автомобил, односно world car, во превод Jeep модел кој ќе се нуди на речиси сите глобални пазари, вклучувајќи го, секако, и европскиот.

Jeep

Ова ќе биде едно од првите STLA Medium возила со 4х4, а е воедно и првиот Jeep модел на оваа платформа. Братучедите на Compass, како Peugeot 3008, Citroen C5 Aircross и Opel Grandland во моментов не нудат 4х4.

Како што веќе навикнавме кај STLA Medium, достапни ќе бидат два хибриди, самополнечки и плаг-ин, како и три ЕВ изведби почнувајќи со 213 коњи и преден погон, па сѐ до 375 коњи и 4х4. Таа сила ја овозможува појачан електромотор на задната оска кој исклучиво ќе се нуди кај Jeep.

Jeep

Во моментов, ако сакате вашиот Compass да ги направи своите предци горди со 4х4, единствениот избор ви е електричната изведба. Но, со оглед на тоа што Jeep Avenger се нуди како хибрид со 4х4, голема е веројатноста е дека и кај Compass ќе се нуди нешто слично, евентуално со повеќе коњи. 

Самополнечкиот хибрид има 145 коњи од 1.2 бензинец со три цилиндри и мал електромотор вметнат во автоматскиот менувач со 6 степени и двојна спојка, додека плаг-инот има 195 коњи со 1.6 турбо бензинец со четири цилиндри како и електромотор со поголема батерија.

Jeep

Батеријата на плаг-ин хибридот, како и кај другите STLA-M модели, има батерија од 17.6 kWh. Засега не се познати бројките за опсегот на струја. Електричните изведби ќе можат да поминат до 680 км, што е многу импресивно, а силата ја добиваат од батерија со 73 kWh, или пак 97 kWh капацитет. Верзијата со 4х4 ќе се нуди исклучиво со помалата батерија.

Jeep

Ентериерот доликува на еден модел со Jeep знак, со неколку различни tributes до поголемите браќа на Compass кои се фокусирани на теренско возење. Екранот позади воланот е помал, додека Jeep се има решено за широк екран за инфозабавните соддржини наместо вертикален, како што е кај C5 Aircross.

Jeep

Еден друг уникатен момент во ентериерот на Compass, освен прекинувачот за видот на терен на кој возите, е менувачот во вид на тркалце. Jeep ветува и повеќе простор во внатрешноста, како и багажник со 550 литри простор, што е одлично. 

Новиот Jeep Compass ќе се склопува во фабриката во Мелфи, Италија, каде што се произведуваше и досегашниот Compass, и каде што од идната година ќе се произведува и новата Lancia Gamma.