Skoda Favorit замислен како модерно ЕВ

Оваа деценија, меѓу другото, го врати ретро дизајнот во автомобилската индустрија. Ова јасно се гледа со модели како Hyundai Ioniq 5, Renault 5 E-Tech и Renault 4 E-Tech, а сигурен сум дека слушнавте дека Yugo ќе се враќа за неколку години. Сега има шанси овој прекрасен подсегмент да добие уште еден конкурент.

Можно е да се врати Skoda Favorit

Skoda

Изминативе неколку дена, Људмил Славов, еден од дизајнерите на Skoda, реши да замисли како би изгледал легендарниот Skoda Favorit кога би бил направен денес, т.е со Modern Solid дизајнерскиот јазик на Skoda.

Skoda Favorit е модел кој што на сите нас и на сите од бивша Југославија ни е познат. Ова беше последниот модел на чешкиот бренд пред Volkswagen да влезе во приказната, а потоа следеа Felicia и Octavia. Favorit беше првиот модел со преден погон и мотор поставен напред.

Skoda

Favorit исто беше достапен и во пикап изведба, како и Forman караван изведба. Производството започна во 1987, а последните пикап модели се појавија во 1995, а набргу потоа дојде и Felicia.

Славов реши да го искомбинира Modern Solid јазикот со ретро елементи кои ги знаеме од Favorit, што значи дека некои од елементите од Modern Solid не се појавуваат тука. Сепак, се гледа од каде доаѓа инспирацијата, а многу ми се допаѓа тоа што задните врати се отвараат обратно, како Rolls-Royce.

Skoda

Со овој концепт за Favorit, Skoda продолжува со своите посвети на старите модели од портфолиото. Досега сме виделе скица за модерна верзија на комбето 1203, како и Slavia мотоциклот, замислен во café racer стил. 

Соопштението кое го објави Skoda не спомнува ништо за сериски модел, но мислам дека од сите досегашни ретро концепти, овој има најголеми шанси да стане сериски модел. Не само што има најголеми шанси, туку има и најмногу смисла; и ретро дизајн и мали ЕВ се во мода моментално. Ајде Skoda, do it.