Започна пробното производство на Fiat 500 со бензински мотор

Пред неколку години пристигна новиот Fiat 500е, кој се нуди исклучиво во електрична изведба. Океј, фер, ко што знаете јас тврдам дека електричен погон најмногу има смисла за мал автомобил како што е Fiat 500. Но, оваа одлука дојде до една неубава последица: изузетно висока продажна цена.

Тоа, плус тоа што купувачите почнаа да гледаат на ЕВ со резерва и повеќе да бираат возила со мотори со внатрешно согорување наместо ЕВ, и можете да видите зошто не му се пишуваше добро на Fiat 500е. Но, се чини дека Fiat дојде до разумна одлука.

Од ноември Fiat 500 со мотор на внатрешно согорување

Fiat

Да, стварно. Fiat планира од ноември оваа година да почне со сериско производство на Fiat 500 со бензински мотор и, пазете ова, мануелен менувач. Од Торино неоддамна ја објавија оваа вест, а со тоа стигнаа и фотографии од неколку pre-production изведби директно од фабриката.

Fiat

Како што гледате, сѐ е речиси исто што се однесува до дизајнот. Малку камуфлажа има на предниот браник, најверојатно бидејќи таму се крие редизајнирана предна маска која ќе му овозможи на моторот да дише. Грото од ентериерот е покриен со црн материјал, но сепак се гледа мануелниот менувач, како и малку реорганизираната контролна табла. Ко што гледам, менувачот изгледа исто како оној на сегашниот неелектричен Fiat 500.

Fiat

Кога сме кај тоа, Fiat уште не потврдиле за кој точно бензински мотор се работи тука. Со оглед на менувачов, и со оглед на тоа што Fiat 500 е базиран на друга платформа и не би можел да се адаптира за хибридниот 1.2 на Stellantis кој го има во другите модели на STLA/EMP платформите, нешто друго ќе се најде под хауба.

Fiat

Според InsideEVs, голема е веројатноста дека ќе биде истиот 1.0 лајт хибрид бензинец со 70 коњи кој е и сега достапен во Fiat 500 Hybrid. Додаваат дека може да е тоа малку, бидејќи новиот 500 е поголем и потежок. Се согласувам и за двете, а и онака нема смисла целосен хибрид да има мануелен менувач. Плус, тековниот Fiat 500 Hybrid стандардно доаѓа со мануелец како и да е.

Fiat

Инаку јас го имам пробано електричниот Fiat 500 во Abarth изведба и бев баш пријатно изненаден. Со бензинскиот мотор ќе може Fiat 500 да биде достапен за поширок спектар на купувачи, и мислам дека со оглед на тековната ситуација во авто индустријата, ова е многу паметна одлука од страна на Fiat. 

Моделиве на овие фотки се предпроизводствени изведби т.е pre-production, сериското производство ќе започне во ноември. Со оглед на тоа, веројатно е дека овој модел ќе стигне кај нас тек во 2026. Навистина многу ме интересира дали ќе испадне сѐ како што треба со овој модел.