Porsche Boxster и Cayman Electric може ќе бидат откажани

Не верувам дека сте изненадени од ова, а искрено да ви кажам, и јас не сум. Прво, Porsche се подготвуваше да ги замени 718 Boxster и Cayman со целосно електрични изведби. Иако одлукава не беше баш масовно прифатена, Porsche инсистираа на оваа одлука.

Со тек на време, потврдија дека ќе има изведби на следните Boxster и Cayman со мотори на внатрешно согорување; прво само врвните изведби требаше да добијат бензинци, па потоа се ширеше муабет дека сите изведби ќе имаат бензинец. Сега, има уште еден, можеби очекуван пресврт на работите.

Можеби воопшто нема да ги видиме електричните Porsche Boxster и Cayman

Porsche

Од времето на објавување уште нема официјална потврда од Штутгарт, но извори блиски до новиот извршен директор, Мајкл Лајтерс, тврдат дека електричното дуо на спортски автомобили ќе бидат жртвувани со цел Porsche да ги намали своите трошоци, првенствено поради увозните тарифи во САД и падот на продажба во Кина, два клучни пазари за германскиот производител. 

Porsche

Сепак, сите знаеме дека тоа не е единствената причина зошто Porsche потенцијално ја има донесено оваа одлука. Светот навистина се олади кон електричните возила, и тоа било какви, а не па спортски чиишто досегашни генерации беа со бензински мотори и полни со карактер.

Porsche

Porsche се спрема за еден вид чистка и на остатокот од понудата поради чувствата на купувачите кон електричните возила; Macan Electric ќе добие пандан со внатрешно согорување, иако тоа не беше првобитниот план, Cayenne Electric не е замена за регуларниот, и сега ова со Boxster и Cayman.

Да напоменам само дека ова не значи дека нема воопшто да има нова генерација на најмалите спортски модели на Porsche, но шансите дека ќе се нудат со електричен погон на било кој начин секојдневно стануваат сѐ помали и помали. Тоа дека ќе има нови Boxster и Cayman со бензински мотори е сега сигурно, но уште не знаеме кога би ги виделе.

Porsche

Иако мислам дека далеку повеќе им лежи на двата модели бензински мотор, и дека потенцијалниот електричен погон може да донесе многу компромиси, би лажел ако кажам дека идејата на електричен Porsche двосед не беше барем малку интригантна. Купувачите и климата во автомобилската индустрија сепак диктираат сѐ, така да, ќе видиме како ќе се развиваат работите понатаму.