Кинескиот бренд Leapmotor ќе склопува возила во фабрика на Stellantis

Европската Унија се труди на секој начин да го спречи влегувањето на повеќе кинески брендови во државите членки, најмногу со тие познати давачки. Сепак, еден кинески бренд сега најде еден вид решение за оваа работа, и со тоа потенцијално може да ја отвара вратата и за други.

Leapmotor ќе се смести во фабрика на Stellantis

Leapmotor

Океј, ова можеби не беше најдобриот начин да го опишам ова, ама ајде малку подетално. За оние кои не знаат, Leapmotor е кинески автомобилски бренд во кој Stellantis има дури 20% влог. Веќе почнаа да се нудат во неколку држави ширум Европа, како што се Обединетото Кралство и Италија.

Пред некое време, извршниот директор на Stellantis, Антонио Филоса, гордо изјави дека наскоро возилата на Leapmotor ќе се склопуваат во една од фабриките на корпорацијата која брои 14 различни брендови.

Leapmotor

Според информации пренесени од Mopar Insiders, фабриката се наоѓа во Шпанија, и иако не се знаат повеќе детали од тоа, најголема е веројатноста дека се работи за фабриката во Зарагоза, која е моментално задолжена за Peugeot 208, Opel Corsa и Lancia Ypsilon.

Leapmotor

Исто така, наскоро во овој објект ќе се произведуваат и литиум-железо-фосфат (LFP) батерии на кинескиот гигант CATL, откако минатата година двете компании најавија заедничка инвестиција од преку 4 милијарди евра. Мене ми има смисла дека и Leapmotor возила ќе се склопуваат во оваа фабрика, а тоа би требало да започне од идната година.

Освен што ова ќе помогне на Leapmotor да ги избегне големите давачки од ЕУ, Stellantis ќе може да го нападне директно пазарот на ефтини, достапни електрични возила, можеби дури и подостапни и поефтини од Fiat Grande Panda и Citroën ë-C3.

Leapmotor

Не се знае кои конкретни модели ќе се произведуваат во Шпанија, но компактниот SUV B10 (синиот), B05 хечбекот кој беше претставен во Минхен (жолтиот), како и малиот Т03 (над овој пасус) се сите добри кандидати. Останува да видиме како ќе се развива оваа работа.